近來有位網友問我，新手應該如何開始跑步，雖然已有不少朋友探討過呢個問題，但既然有人問，我當然不介意分享我的睇法。希望對想跑步但又不知道怎樣開始的朋友有所啟發。
以下幾點，純粹我的個人意見，希望各位新手找到開始的方向。
1. 買一套你喜歡的運動裝備
「吓？我都未知鍾唔鍾意跑，就要買咁多野？」我唔係叫你買來浪費，但穿上一套漂亮的運動服和一對舒服的跑鞋，確實能令你跑得更開心，正所謂「工欲善其事，必先利其器」，無裝備又點會跑得開心又舒服呢！不用買非常昂貴的，反正我相信即使你跑幾次就放棄，呢堆用品總有再次有用的一日。
1. 問問身邊跑步朋友意見 面對新事物時必定非常不知所措，到底應該去邊跑？要下載什麼應用程式？買什麼裝備？呢啲問題在我剛接觸跑步時全部都問過。不用怕醜，有問題，就去問問身邊有跑步經驗的朋友吧。記得當年我問過一個中學同學，她對我的問題一一耐心回答，否則我都唔知點開始。
2. 加入Facebook跑步群組
Facebook跑步群組的好處就是—人多。你問一個問題，小至十個，多至幾十個師兄師姐出來解答，真係Google大神都唔使搵。群組內亦流行「交功課」，即是將自己的訓練公諸同好，方便大家參考。有時亦會有跑步活動，新手可在當中尋找同伴。
3. 參加跑班
如果你想有規律的訓練，想有教練帶領和指導，參加跑班不失為一個好選擇。跑班每星期都有課表，只要跟就對了。上堂時又有同學仔互相鼓勵，新手在這環境下較易堅持。
4. 踏出第一步，感受跑步的樂趣
最重要都是踏出第一步，換上跑步裝去跑吧，否則以上的方法全部都是廢話！無論是運動場、公園，還是海濱，找個舒服安全的地方，完成你的首次訓練吧。
5. Post呃like相
最後最後，不如post張相上Facebook呃下like啦！人人都喜歡俾人讚，跑完步，放張相上Facebook，見到留言「好叻呀！」、「加油呀！」等等字句，心入面一定欣喜若狂。之後你一定會想繼續跑，繼績post，繼績俾人讚，你話係咪好吸引先？
